ភ្នំពេញ៖លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានដឹកនាំកិច្ចប្រជុំពិភាក្សាការងាជាមួយគណៈប្រតិភូវិនិយោគិនជប៉ុនរៀបចំដោយអង្គការពាណិជ្ជកម្មក្រៅប្រទេសជប៉ុន (JETRO) ដោយមានការចូលរួមពីតំណាងវិនិយោគិនជប៉ុនក្នុងវិស័យចំណីអាហារ អេឡិចត្រូនិក សុខាភិបាល ឡូជីស្ទិក ធនាគារ សំណង់និងអចលនទ្រព្យសរុបប្រមាណ៣០រូប។
លោក សុខ ចិន្តាសោភា បានជម្រាបជូនគណៈប្រតិភូពីខ្លឹមសារសំខាន់ៗនៃច្បាប់ស្តីពីវិនិយោគនៃព្រះរាជាណាចក្រកម្ពុជា ដែលត្រូវបានប្រកាសដាក់ឱ្យប្រើប្រាស់កាល ពីថ្ងៃទី១៥ ខែតុលា ឆ្នាំ២០២១ ដូចជា កិច្ចសម្របសម្រួល ការធានានិងការការពារ ការលើកទឹកចិត្ត និង ការថែទាំវិនិយោគ។ បន្ថែមលើនេះលោកក៏បានបញ្ជាក់ជូនគណៈប្រតិភូថា៖ ច្បាប់ស្តីពីវិនិយោគថ្មីនេះបានបង្ហាញឱ្យឃើញច្បាស់ពីការត្រៀមលក្ខណៈរបស់រាជរដ្ឋាភិបាលក្នុងការជំរុញនិងទាក់ទាញវិនិយោគបន្ថែមប្រកដោយគុណភាព ដើម្បីចូលរួមឱ្យកាន់តែស៊ីជម្រៅទៅក្នុងខ្សែច្រវាក់តម្លៃតំបន់ និងសកល តាមរយៈយុទ្ធសាស្ត្របូកមួយ។
លោកស្រី Marisa Haruta តំណាងអង្គការ JETRO ប្រចាំកម្ពុជា បានមានប្រសាសន៍ថា៖ក្រុមប្រឹក្សាអភិវឌ្ឍន៍កម្ពុជាបង្កើតនូវបរិយាកាសវិនិយោគដ៏ល្អប្រសើរលើគ្រប់វិស័យ និងផ្តល់នូវការឆ្លើយតបប្រកបដោយភាពទន់ភ្លន់ ចំពោះក្តីកង្វល់ និងសំណូមពររបស់វិនិយោគិនជប៉ុន។
គិតត្រឹមខែកក្កដា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជាបានសម្រេចអនុញ្ញាតឱ្យក្រុមហ៊ុន ជប៉ុនធ្វើការវិនិយោគចំនួន ១៤៨តម្រោង ដែលមានទុនវិនិយោតសរុបប្រមាណ ២,៨៥ ប៊ីលានដុល្លារ អាមេរិក។
គួរបញ្ជាក់ផងដែរថា កម្ពុជា-ជប៉ុន បានរៀបចំយន្តការថែទាំវិនិយោគតាមរយៈកិច្ចប្រជុំទ្វេភាគី ដែលត្រូវបានរៀបចំឡើងចាប់តាំងពីឆ្នាំ២០០៩មក ក្រោមក្របខ័ណ្ឌនៃកិច្ចព្រមព្រៀងរវាងព្រះរាជាណា ចក្រកម្ពុជា និងជប៉ុន ស្តីពីសេរីភាវូបនីយកម្ម ការជំរុញនិងការការពារវិនិយោគ ដែលត្រូវបានចុះហត្ថ លេខាដោយ សម្តេចតេជោនាយករដ្ឋមន្ត្រី និងអតីតនាយករដ្ឋមន្ត្រីជប៉ុន ស៊ីនហ្សូ អាបេ (Shinzo Abe) កាលពីថ្ងៃទី១៤ ខែមិថុនា ឆ្នាំ២០០៧ ដែលកិច្ចប្រជុំបន្ទាប់នឹងប្រព្រឹត្តទៅនៅថ្ងៃទី៧ ខែកញ្ញា ឆ្នាំ ២០២២ នៅទីស្តីការក្រុមប្រឹក្សាអភិវឌ្ឍន៍កម្ពុជា កិច្ចប្រជុំនេះផ្តល់ឱកាសជូនវិនិយោគិនជប៉ុនលើក ឡើងនូវបញ្ហាប្រឈមនានា និងសំណូមពរជូនតំណាងរាជរដ្ឋាភិបាល ដើម្បីពិនិត្យ និងរកដំណោះស្រាយ ក្នុងគោលបំណងធ្វើឱ្យប្រសើរឡើងនូវបរិយាកាសវិនិយោគ និងធុរកិច្ចនៅកម្ពុជា៕ដោយៈសិរីមតី
